Mar 11 | MHL | STEP | Yeesus ona teeria onaiya ikiwemi Yerusalem mamaiyarem-ikok Betfage ne Betani owowa fuunemik. Owowa erup nain Oliw ema kiira-pa ikua. Nan ikok ona teeria mua erup wia sesekami wia maakek, “Ni owowa eefin ikiwep donki eremina-ko kaikap-puamik nain urufowen. Mua-ko me irowa ikemik. Nain urufap-na ifara wasirkap aawep pekapeka.

Mark 11

Yeesus saria maneka sira ookami Yerusalem ikiwok

(Matiu 21.1-11, Luk 19.28-40, Yon 12.12-19)

1 Yeesus ona teeria onaiya ikiwemi Yerusalem mamaiyarem-ikok Betfage ne Betani owowa fuunemik. Owowa erup nain Oliw ema kiira-pa ikua. Nan ikok ona teeria mua erup wia sesekami wia maakek, “Ni owowa eefin ikiwep donki eremina-ko kaikap-puamik nain urufowen. Mua-ko me irowa ikemik. Nain urufap-na ifara wasirkap aawep pekapeka. 3 Aria mua-ko nia nokarinok-na, ‘Ni moram naap oniman?’ Naeya maakeka, ‘Yiena saria mauwowa wiar ikaeya aawimik. Ikoka nainiw sesekeya pekapikuan.’”

4 Aria wi ikiwep donki nain urufamik, pika omopora-pa kaikap-puiwkin ikua, era pona-pa. 5 Urufap wasirkam-ikaiwkin mua papako-ke wia nokaremik, “Ei, ni moram donki wasirkiman?” 6 Ne wi Yeesus opora wia maakek naap wia maakemik. Ne wi eliw naiwkin aawemik. 7 Donki pikiwep wiena mia suuwowa papako iinan-pa ikowamik. Ne Yeesus donki iinan-pa pokap ikiwok. 8 Ikim-ikaeya yakeyak maneka wiena mia suuwowa era-pa ikow-ikiwemik. Ne mua papako owow erepura-pa nomokow mekira pu-puukap era-pa wu-ikiwemik.

9 Yeesus wi yakeyak maneka gone-pa wiar ikiwem-ikua, mua papako miimemik ne papako muraremik. Faremi ikiwem-ikemik,

“Mua Maneka unuma fakerikua! Mua eena Iinan Mua Maneka unuma-pa ekapiya nain Mua Maneka-ke kema eliwa iwinok!
10 Yiena nembesir Dewit iiriw saria maneka ikua, nain ikoka os-ke i teeria maneka fain saria maneka yiar ikaeya eliwa ikaiyen! Ne Mua Maneka teeria nain yia kekanowinon! I Mua Maneka unuma fakerikua!”
11 Naap faremi Yeesus pikiwemi Yerusalem kereremik. O fuunep tempel koor kemena ikiwok. Ne maa unowa wiar uruf-ikiwep-puap orop ona teeria wiamiya Yerusalem piipuap kiremi Betani owowa ikiwemik, ama orom-ikaeya.

Yeesus nomokowa fik maakeya me makenarek

(Matiu 21.18-19)

12 Aria Yeesus Betani-pa nan inep epa wiimeya uuriw ona teeria wiamiya Yerusalem ikiwem-ikok wuailek. 13 Wuailep nomokowa fik ifa unowa onaiya ikaeya urufak. Makena-ko aawep enimekam naep mamaiya ekap urufak-na makena weetak. Makena marew, ifa muutiw ikua. ^{▼▼11.13Fik makenarowa saana me kererowa ikok ifa wuami makena kui-kuisow pun wuiya.} Moram iir nain nomokowa fik makenarowa epa eewuar ikua. 14 Naap urufap nomokowa nain maakek, “No nainiw me makenarinan, makena me nefa enimuk! Weetak akena.” Naap maek nain ona teeria pun miimamik.

Yeesus tempel koora-pa sesa mua wia fa-faek

(Matiu 21.12-17, Luk 19.45-48, Yon 2.13-22)

15 Aria wi ikiwep Yerusalem kereremik. Ne Yeesus tempel koor kemena ikiwok-na wi mua maa sesekami maa sesenarem-ikemik. Naap wia urufap wia iiraremi maamuma kiripap tempel maamuma wiimik nain esimsa wiar anu-fienomakek. Ne nepa ibiamun sesekam-ikemik nain pun pokow maa wiar anu-fi-fienak. 16 Ne naap onami maa unowa tempel koor pika kemena-pa pikip pekapem-ikowa nain emi wia wuak. 17 Ne wia maakek, “Mua Maneka-ke opora wiar siisimep-puamik nain me urufiman-i? Feenap maek, ‘Yena koora-na wi owow unowa mua ekapep yo efa kema suuwap efa farow epa-ke.’ Nain nis-ke ikum mua koora arowaman.”

18 Mua unowa Yeesus opora naap miimap kakaemik. Naapeya wi pris woos mua ne sira amis mua onaiya nain miimap keker opap Yeesus ifakimu naep era akupamik. 19 Ne urer akena Yeesus ona teeria onaiya Yerusalem piipuap kiiriw nainiw ikiwemik.

Mua Maneka opora opap ikok maa nokariwkin wiinon

(Matiu 21.20-22)

20 Ne ikip nan ikok uuriw nainiw iikirap ikiwem-ikok nomokowa fik nain urufamik-na iiwawun ififarek. Ne Pita-ke nain urufap kema suuwap Yeesus maakek, “Somek mua, urufe. Inon nomokowa fik amukaren nain aakisa iiwawun ififarek.”

22 Ne Yeesus-ke maakek, “Ni Mua Maneka opora wiar opaka. O mua Mua Maneka opora opap ikok kema me ere-erup arinon, o kema maneka maa nain makena efar imenarinok naep ema fain maakinon, ‘No iikirap ifera-pa name wafure.’ Yo makena nia maakiyem, nain ikoka makena wiar imenarinon. 24 Ne yo makena nia maakiyem, ni maa kookalep Mua Maneka faremi kema maneka maa nokaremi maa nain makena imenarinon naowen-na ikoka niena maeman naap niar imenarinon. 25 Ni Mua Maneka faremi mua oko sira samora nia onamik nain kema suuwap-na kema me bagiwireka, pina nain wiar iirareka. Ni sira naap onowen-na niena Niawi owow iinan-pa ikua nain pun pina niar iirarinon. [ 26 Ni mua papako sira samora nia onimik nain pina me wiar iirarowen-na Niawi iinan-pa ikua nain pun pina me niar iirarinon.]”

Yeesus uuwowa onoma wiar nokaremik

(Matiu 21.23-27, Luk 20.1-8)

27 Aria Yeesus ona teeria onaiya kiiriw nainiw Yerusalem ikiwemik. Fuunep Yeesus tempel pika kemena ikiwem-ikaeya wi pris woos mua, sira amis mua ne wi owow woos mua unow onaiya o wiar ekamik. Ekap nokaremik, “Ei, no sira eena onin fain naareke nefa sesekeya naap onin? Ne naareke kekanowa niemi uuwowa fain niek?”

29 Ne wia maakek, “Yos pun opora-ko nia nokarinen. Yo opora kakeniw kiripomowen-na yo kekanowa naareke yieya sira-sira oniyem nain nia maakinen. 30 Feenap, iiriw Yon Baptais eka-pa wia yasuwam-ikua nain Mua Maneka-ke uuwowa iwok-i e wi mua-ke maakemik? Aria yo nain kiripomeka.”

31 Naeya wi-wieniw uuwunemi maemik, “I kamenap maiyen? I feenap maiyen-na, ‘Mua Maneka-ke uuwowa nain iwok,’ naap maiyen-na yia nokarinon, ‘Naap nain ni moram opora me wiar opaman?’ O mua-ke maakiwkin uuwak, opora naap maowa pun me pepek.” (Wi naap maowa keker opamik. Moram wi emeria mua unowa, Yon Baptais-na profet-ke naemik.)

33 Wi opora nan korinep maakemik, “I me amisaremik.” Ne wia maakek, “Naapeya-na yos pun me nia maakinen, mua naareke uuwowa fain yiek.”